இருளின் கருவறையிலிருந்து எழும் முதல் ஒளிக்கீற்று: ஒரு புதிய பிரபஞ்சத்தின் பிறப்பு

 

நேற்றிரவு, நீங்கள் இறந்துவிட்டீர்கள். அந்த நாளின் நான் என்ற முகமூடி கழற்றி எறியப்பட்டது. அனுபவங்களின் சுவடுகளும், பற்றுகளின் சங்கிலிகளும் இரவின் எல்லையற்ற பெருங்கடலில் கரைந்து போயின. நீங்கள் ஒரு வரையறைகளற்ற வெறுமையாக, ஒரு தூய சாட்சியாக, ஒரு மௌனமான இருப்பாக அந்தப் புனித மரணத்தின் அமைதியில் உறங்கச் சென்றீர்கள்.

இப்போது... மெல்ல மெல்ல, மிக மெதுவாக, உணர்வு திரும்புகிறது. இருளின் அடர்த்தியான திரையை ஊடுருவிக்கொண்டு, முதல் மெல்லிய, தங்க நிற ஒளிக்கீற்று உங்கள் மூடிய இமைகளைத் தட்டுகிறது. கண்களைத் திறக்கிறீர்கள்.

சுற்றுச்சூழல் அதேதான். உங்கள் அறை, உங்கள் படுக்கை, ஜன்னலுக்கு வெளியே தெரியும் அதே மரங்கள். ஆனால், ஏதோ ஒன்று முற்றிலும் மாறியிருக்கிறது. இது நேற்றைய சோர்வான தொடர்ச்சியா? அந்த இயந்திரத்தனமான, கடமைக்காக எழும் காலைப்பொழுதா?

இல்லை. நிச்சயமாக இல்லை. ஆயிரக்கணக்கான முறை இல்லை.

நேற்றைய நீங்கள்- அந்தச் சுமைகளைச் சுமந்தவர், கவலைகளால் அரிபட்டவர், குற்றவுணர்ச்சியால் கூனியவர், எதிர்பார்ப்புகளால் அழுத்தப்பட்டவர் - அவர் இறந்துவிட்டார். அவர் இனி இல்லை. இப்போது நீங்கள் உணர்வது, அந்தப் புனித மரணத்திற்குப் பின் எஞ்சியிருக்கும் ஒரு ஆழமான, விவரிக்க முடியாத அமைதி. ஒரு நம்பமுடியாத, சிறகுகள் முளைத்தது போன்ற இலேசான தன்மை. இது, அந்த எல்லையற்ற வெறுமையின் கருவறையிலிருந்து பிறக்கும் முதல் கணம். ஒரு புதிய பிரபஞ்சத்தின் முதல் மூச்சு.

இதுதான் விடியலின் பெருவெடிப்பு. ஒவ்வொரு காலையும், நீங்கள் நனவுடன் பயிற்சி செய்யும் அந்த தினசரி மரணத்திற்குப் பிறகு, நீங்கள் அனுபவிப்பது வெறுமனே ஒரு புதிய நாள் அல்ல. அது ஒரு புதிய பிரபஞ்சத்தின் பிறப்பு. உங்கள் பிரபஞ்சம்.

 ஒவ்வொரு காலையும் ஒரு புதிய பிறப்பு: நேர்கோட்டை உடைக்கும் சுழற்சி

ஒற்றை வாழ்வின் சிறையில் சிக்கியிருப்பவர்களுக்கு, காலை என்பது நேற்றைய நாளின் சோர்வான, விரும்பத்தகாத தொடர்ச்சி. அலாரம் அலறுகிறது, மனம் உடனடியாக அன்றைய வேலைகளின் பட்டியலையும், தீர்க்கப்படாத பிரச்சனைகளையும், எதிர்காலக் கவலைகளையும் பற்றி ஓடத் தொடங்குகிறது. உடல் கனக்கிறது, ஆன்மா சோர்ந்து கிடக்கிறது.

ஆனால், புலியின் பாதையில் பயணிப்பவர்களுக்கு, ஒவ்வொரு காலையும் ஒரு அதிசயம். ஒரு கொண்டாட்டம். ஒரு புனிதமான மறுபிறப்பு.

பிரபஞ்சத்தின் ஆதிப் பெருவெடிப்பைப் பற்றிச் சிந்தியுங்கள். எல்லையற்ற, அசைவற்ற, குணங்களற்ற அந்த மூல நிலையிலிருந்து, திடீரென ஓர் ஆற்றல் வெடித்துச் சிதறி, காலம், வெளி, ஒளி, பொருட்கள் என அனைத்தும் தோன்றின. அதுபோலவே, நேற்றைய மரணத்திற்கு பின் நீங்கள் அடையும் அந்த நிசப்தமான, அசைவற்ற வெறுமையிலிருந்து, விடியலின் முதல் ஒளியோடு, ஒரு புதிய நீங்கள் பிறக்கிறீர்;கள்.

இந்த நீங்கள் நேற்று வாழ்ந்தவரல்ல. இவருக்கு கடந்த காலத்தின் கல்லறைகள் இல்லை. எதிர்காலத்தின் பாலைவனங்கள் இல்லை. இவர் இந்த நொடியில், இந்த விடியலின் பரிசுத்தத்தில், புதிதாக, தூய்மையாகப் பிறந்தவர். இவர் ஒரு வெற்றுப் பலகை. ஒரு திறந்த புத்தகம்.

நேரம், வெளி, சாத்தியங்கள் - அனைத்தும் புதிதாக உருவாகும் உணர்வு: பிரபஞ்சத்தின் நடனம்

இந்த மறுபிறப்பின் மாயாஜாலத் தருணத்தில், காலம் என்பது நேற்றைய தொடர்ச்சியாக, உங்களைத் துரத்தும் ஒரு எதிரியாகத் தோன்றாது. அது, உங்களுக்காகவே, இந்தப் புதிய பிறப்பிற்காகவே, புதிதாக விரிந்து பரவும் ஒரு எல்லையற்ற வெளியாகத் தோன்றும். ஒவ்வொரு வினாடியும் புத்தம் புதியது, இதற்கு முன் ஒருபோதும் அனுபவிக்கப்படாதது. கடிகாரத்தின் முட்கள் ஓடுவது போலத் தோன்றாது; மாறாக, காலம் ஒரு மென்மையான நதி போல, உங்களை நிகழ்கணம் என்ற கடலில் மென்மையாக ஏந்திச் செல்வது போல உணர்வீர்கள்.

சுற்றியுள்ள வெளி கூட ஒரு புதிய பரிமாணத்தைப் பெறும். உங்கள் அறையின் சுவர்கள், உங்கள் வீட்டின் பொருட்கள், ஜன்னலுக்கு வெளியே தெரியும் அதே மரங்கள், அதே வானம் - அனைத்தும் ஒரு புதிய ஒளியில், ஒரு புதிய உயிர்ப்புடன், ஒரு புதிய அர்த்தத்துடன் தோன்றும். ஏனென்றால், நீங்கள் அவற்றை நேற்றைய சலிப்புற்ற, பழக்கப்பட்ட கண்களோடு பார்க்கவில்லை. நீங்கள் அவற்றை இந்தப் புதிய பிறப்பின், இந்த நிகழ்கணத்தின் தூய, அதிசயிக்கும் பார்வையோடு பார்க்கிறீர்கள்.

மிக முக்கியமாக, சாத்தியங்கள் எல்லையற்றதாக, வானத்தைப் போல விரிந்து பரந்து தோன்றும். நேற்று நீங்கள் அடைந்த தோல்விகள், சந்தித்த தடைகள், உங்களைக் கட்டிப்போட்ட வரம்புகள் - எதுவும் இப்போது உங்களைக் கட்டுப்படுத்தாது. இன்று ஒரு வெற்றுப் பக்கம். அதில் நீங்கள் காவியம் எழுதலாம், சித்திரம் தீட்டலாம், அல்லது வெறுமனே அந்த வெற்றிடத்தின் அழகை ரசிக்கலாம். எந்த திசையிலும் பயணிக்கலாம். எந்தவொரு புதிய சாத்தியத்தையும், புதிய சுயத்தையும் உருவாக்கலாம். ஏனென்றால், நீங்கள் புதிதாகப் பிறந்திருக்கிறீர்கள். உங்கள் ஆற்றல், அந்த மூல நிலையிலிருந்து, புதிதாக, கரைபுரண்டு ஓடுகிறது.

நிகழ்கணத்தின் புத்துணர்ச்சியை முழுமையாக அனுபவித்தல்: புலன்களின் விழிப்பு

இந்த விடியலின் பெருவெடிப்பு உங்களுக்கு வழங்கும் விலைமதிப்பற்ற பரிசு, நிகழ்கணத்தை அதன் முழுமையான, தீவிரமான புத்துணர்ச்சியுடன் அனுபவிக்கும் திறன். உங்கள் புலன்கள் கூர்மையடைகின்றன, விழிப்படைகின்றன.

 காலை நேரக் காபியின் மணம்: அது வெறுமனே ஒரு பானமல்ல. அது பூமியின் அரவணைப்பு, நெருப்பின் வெப்பம், காற்றின் மணம் கலந்த ஒரு திரவக் கவிதை. அதன் ஒவ்வொரு துளியும் உங்கள் நாவில் நடனமாடும்.

குளிர்ந்த நீரின் ஸ்பரிசம்: அது உங்கள் உடலை  தழுவும்போது, அது வெறுமனே சுத்தப்படுத்துவதல்ல் அது உங்களை எழுப்புகிறது, புத்துயிரூட்டுகிறது, இந்த நிகழ்கணத்திற்கு உங்களை வரவேற்கிறது.

பறவைகளின் கீதம்: அது வெறும் சத்தமல்ல. அது வாழ்வின் கொண்டாட்டம், இயற்கையின் இசை, பிரபஞ்சத்தின் மெல்லிய தாலாட்டு.

சூரிய ஒளியின் இதம்: அது உங்கள் தோலில் படும்போது, அது வெறுமனே வெப்பமல்ல் அது பிரபஞ்சத்தின் ஆற்றல், வாழ்வின் ஆதாரம்,

 இவை அனைத்தும் முன்பை விடப் பல மடங்கு தீவிரமாகவும், தெளிவாகவும், அழகாகவும் உணரப்படும். ஏனென்றால், உங்கள் மனம் கடந்த காலத்தின் கல்லறைகளிலோ, எதிர்காலத்தின் பாலைவனங்களிலோ அலைபாயவில்லை. அது முழுமையாக, ஆழமாக, இந்த நிகழ்கணத்தில், இந்த அனுபவத்தில் நிலைபெற்றிருக்கிறது.

நேற்றைய கவலைகளோ, நாளைய திட்டமிடல்களோ உங்கள் கவனத்தைச் சிதைக்காது. நீங்கள் செய்யும் ஒவ்வொரு சாதாரண செயலிலும் - அது பல் துலக்குவதாக இருந்தாலும் சரி, வீட்டைப் பெருக்குவதாக இருந்தாலும் சரி, பேருந்தில் பயணிப்பதாக இருந்தாலும் சரி - ஒரு தியானத்தின் அமைதி இருக்கும். ஒரு முழுமையான இருப்பு நிலை இருக்கும். நீங்கள் செயலைச் செய்ய மாட்டீர்கள்; நீங்கள் செயலாகவே மாறுவீர்கள்.

இந்த நிலையில், சலிப்பு என்பதற்கு இடமே இல்லை. ஏனென்றால், ஒவ்வொரு கணமும் புதிது, ஒவ்வொரு அனுபவமும் ஒரு முதல் அனுபவம். சாதாரண செயல்கள் கூட அசாதாரணமானவையாக, ஆனந்தம் தருபவையாக மாறும். வாழ்க்கையின் ஒவ்வொரு கணமும் ஒரு பரிசாக, ஒரு கொண்டாட்டமாக, ஒரு அதிசய நிகழ்வாகத் தோன்றும்.

 பெருவெடிப்பின் ஆற்றல்: அச்சிலிருந்து பிறக்கும் சக்தி

வழக்கமாக நாம் காலையில் எழும்போது, நேற்றைய சோர்வையும், இன்றைய வேலைகளின் சுமையையும், எதிர்காலக் கவலைகளையும் ஒரு கனமான மூட்டையாகச் சுமந்துகொண்டே எழுகிறோம். அந்த ஆற்றல் குறைவான நிலையிலேயே நாளைத் தொடங்குகிறோம்.

ஆனால், இன்றிரவு நீ இறப்பாய் என்ற பயிற்சியைத் தொடர்ந்து செய்து, ஒவ்வொரு காலையும் இந்த விடியலின் பெருவெடிப்பை அனுபவிக்கும் போது, நீங்கள் ஒரு முற்றிலும் புதிய, தூய்மையான, சக்திவாய்ந்த ஆற்றலுடன் நாளைத் தொடங்குகிறீர்கள்.

இது வெறும் உடல் ரீதியான சுறுசுறுப்பு அல்ல. இது அதைவிட ஆழமானது. இது ஒரு மன ரீதியான தெளிவு, ஓர் உணர்வு ரீதியான சமநிலை, ஓர் ஆன்ம ரீதியான சக்தி. இது, பற்றுகளற்ற நிலையிலிருந்து, குற்றவுணர்ச்சியற்ற மனதிலிருந்து, பயங்களற்ற இதயத்திலிருந்து, நிகழ்கணத்தில் முழுமையாக நிலைபெற்றிருக்கும் அந்த அசைவற்ற ~அச்சிலிருந்து| பிறக்கும் ஆற்றல்.

இந்த ஆற்றல், அன்றைய நாளின் சவால்களை எதிர்கொள்ளவும், வாய்ப்புகளைப் பயன்படுத்திக்கொள்ளவும், உறவுகளில் அன்புடன் பழகவும், வேலைகளைத் திறம்படச் செய்யவும் உங்களுக்கு உதவும். நீங்கள் சோர்வடைய மாட்டீர்கள், ஏனென்றால் உங்கள் ஆற்றல் உங்கள் அக மூலத்திலிருந்து தொடர்ந்து வந்துகொண்டே இருக்கும்.

இதுதான் தினசரி மறுபிறப்பின் சக்தி. இது ஒற்றை வாழ்வின் சிறை|யின் சுவர்களை நொறுக்கி, சத்த பிரமிடு|க்கு அப்பால், ஒவ்வொரு நாளையும் ஒரு முழுமையான, புதிய, அர்த்தமுள்ள வாழ்க்கையாக வாழும் சுதந்திரத்தை அளிக்கிறது.

ஆனால், இந்தப் பெருவெடிப்பின் ஆற்றல், இந்தப் புத்துணர்ச்சி, இந்தப் பிரகாசம் நாள் முழுவதும் நீடிக்குமா? பகலின் இரைச்சல்களும், உலகின் அழுத்தங்களும், பழைய பழக்கங்களின் இழுப்புகளும் நம்மை மீண்டும் அந்தச் சோர்வான, பழக்கப்பட்ட நிலைக்குத் தள்ளிவிடாதா? விடியலின் இந்த விரிவடைதல், மீண்டும் சுருங்கத் தொடங்காதா?

ஆம், தொடங்கும். ஏனென்றால், அதுவே சுழற்சியின் நியதி. இரவு நெருங்கும்போது, இந்தப் பெருவெடிப்பு மெல்ல மெல்ல அதன் எதிர்நிலையை நோக்கி நகரும். அடுத்த அத்தியாயத்தில், பகல் மறைந்து, இருள் சூழும்போது நிகழும் அந்த சக்திவாய்ந்த உள்வாங்குதலை, அந்தக் கரைந்து போகுதலை - ஒடுங்குதலை - ஆராய்வோம்.